កម្សាន្ត៖ តារាសំដែងស្រីកូរ៉េ​ Jung Ho-yeon ថ្មីៗនេះ ទើបតែត្រូវបានប្រកាសតែងតាំងជាទូតសុឆន្ទៈពិភពលោក តំណាងឱ្យ Brand លំដាប់ពិភពលោករបស់បារាំង Louis Vuitton ដែលមានន័យថានាងជាទូតសុឆន្ទៈមួយរូបទៀតនៃផលិតផលប្រណិតលំដាប់ពិភពលោកនេះ បន្ទាប់ពីក្រុមតារាចម្រៀងក្រុមបុរស BTS។

កញ្ញា Jung ឬអ្នកគាំទ្រស្គាល់ថាជាតួអង្គ 067 ក្នុងរឿងបែបរន្ធត់ Squid Game ដែលកំពុងល្បីខ្លាំងក្នុងកម្មវិធីទស្សនាភាពយន្ត Netflix ដែលអ្នកគាំទ្រ និងអ្នកទស្សនាភាពយន្តនេះបាននិយាយបែបកំប្លែង និងលេងសើចថា ត្បិតតែនាងមិនមែនជាអ្នកឈ្នះលុយ ៤៥,៦ពាន់លានវ៉ុនក្នុងហ្គេមនៃភាពយន្ត តែនាងត្រូវលាភធំពិតប្រាកដរាប់លានវ៉ុននៅក្នុងជីវិតពិត។

ត្រឹមតែប៉ុន្មានថ្ងៃប៉ុណ្ណោះ ក្រោយខ្សែភាពយន្តភាគនេះចេញបញ្ចាំងចប់ នាង Jung Ho-yeon បានស្ទុះឡើងខ្លាំងនូវចំនួន Follower លើបណ្តាញសង្គម Instagram របស់នាង ពោលគឺបច្ចុប្បន្ននាងមានអ្នកចុច Follow ចំនួន ១៥,៦លាននាក់ ដែលជាតួលេខខ្ពស់ជាងគេបង្អស់នៃបណ្តាតារាសំដែងស្រីរបស់កូរ៉េខាងត្បូង។ ផុសដែលប្រកាសលើការសហការជាមួយក្រុមហ៊ុន Louis Vuitton ដែលបង្ហោះលើ Instagram របស់នាង Jung Ho-yeon កាលពីម្សិលមិញ មានអ្នកចុច Like ប្រមាណជា ៥,៣លាននាក់។

ពាក់ព័ន្ធនឹងរឿង Squid Game ដែលកំពុងផ្ទុះការគាំទ្រខ្លាំងក្នុង Netflix ផលិតករភាពយន្ត លោក  Hwang Dong-hyuk នៅមិនទាន់បង្ហើបពីផែនការនៃការផលិតវគ្គទី២ នៅឡើយទេ ដោយលោកគ្រាន់តែបាននិយាយថា នៅពេលនេះលោក ព្រមទាំងក្រុមការងារផលិតភាពយន្តនេះទាំងអស់ កំពុងសប្បាយរីករាយ និងពេញចិត្តខ្លាំងនូវសមិទ្ធិផលដែលកំពុងកើតមាននេះ៕